0.0°C
Kico nos Expertonan ta bisa?
Datonan Climatico
Meteorologische Dienst Aruba
Calor por trece reto di salud pa hende y animal; e por tin influencia directo riba nos estilo di bida. Pero tambe e por crea peliger di candela durante e temporada di secura. Temperatura halto ta conduci tambe na un aumento grandi den uzo di coriente. Ta logico, pasobra nos ta uza airco y ventilacion mas tanto pa tene nos cas y lugar di trabou friu y fresco. Uzo di awa tambe por subi durante e temporada di calor. Comprendibel; nos animalnan, nos matanan y nos mes ta uza mas awa pa refresca y keda hidrata.
Ta importante pa proteha bo mes y otro hende contra calor extremo. Ta importante pa actua responsablemente cu candela y pa uza awa y coriente mas consciente. Pone atencion extra na mucha, adultonan mayor y personanan cu resistencia abou. Y naturalmente no por lubida e mascotanan.
Con? Riba e website aki bo ta haya mas informacion di con bo por prepara bo mes y bo sernan keri pa Temporada di Calor. Ademas bo ta ricibi tipnan practico pa pasa e 4 lunanan aki sin hopi molester.
Temporada di Calor na Aruba!
Cu Temporada di Calor nos ta referi specificamente na e 4 lunanan mas cayente di aña; di juni te cu september. Den e lunanan aki, temperatura na Aruba por subi regularmente di 32 te 35 grado Celsius. E periodo di calor aki tin un impacto grandi riba nos bida.
